திரைப்பட இலக்கியச் சங்கமம் - வேண்டுகோள்

அன்புடையீர்,

திரைப்படத் துறையையும் இலக்கியத்துறையையும் இணைக்கவேண்டும், திரைப்படத் துறையில் ஒரு நட்புவட்டத்தை வளர்க்கவேண்டும் என்பது போன்ற எண்ணங்களுடன் ஆரம்பிக்கப்பட்ட நமது திரைப்பட இலக்கியச் சங்கமம் தொடர்ந்து ஐந்து வருடங்களைத்தாண்டி வெற்றிகரமாக நடத்தப்பட்டு வருவது மிகுந்த பெருமிதத்தை அளிக்கிறது.

இந்த சங்கமத்தின் லட்சியங்களை நிறைவேற்றவும், திரைத்துறைக்கு புதியதாக வருபவர்களுக்கும் வெற்றியைத் தேடுபவர்களுக்கும் வழிகாட்டவும், திரைக்கு வரும் அனைத்து படைப்புக்களையும் ஆக்கப்பூர்வமாக விமர்சிக்கவும், தயாரிப்பாளர்களையும் படைப்பாளிகளையும் பாராட்டவும், தொடர்ந்து மேலும் பல முயற்சிகளை எடுக்கவேண்டியிருக்கிறது. அதற்கான சிறப்புக் கூட்டங்களையும் மற்ற நிகழ்வுகளையும் பெரிய அளவில் நடத்தவேண்டியிருக்கிறது.

அதற்காக திரைப்படத்துறைக்கு மிகவும் தேவையான சில புத்தகங்களை திரைப்பட இலக்கியச் சங்கமத்தின் சார்பாக பதிப்பிக்க விரும்புகிறேன். அதன் முதல் படிதான் ‘திரைத்துறையில் வெற்றிபெறுவது எப்படி: பாகம் 1இ திரைப்படம்- தயாரிப்பாளர்களின் கலை’ என்ற புத்தகம்.

இந்த நூலை விற்பதால் கிடைக்கும் லாபத்தைக்கொண்டு திரைப்பட இலக்கியச் சங்கமத்தை தொடர்ந்து நடத்த திட்டமிட்டுள்ளேன். இதன் மூலமாக இந்த சங்கமத்தின் லட்சியங்களை எட்டமுடியும் என்று நம்புகிறேன்.

இந்த புத்தகத்தை நியாயமான விலையில் திரைத்துறைக்கு வரவிரும்பும் அனைவரிடமும், மாணவர்களிடமும், திரைத்துறையில் வாய்ப்பைத் தேடி அலையும் திறமைசாலிகளிடமும் கொண்டுசேர்க்கும் விதமாக பதிப்பிக்க உங்களுடைய உதவியை நாடுகிறேன். 200க்கும் கூடுதலான பக்கங்களைக்கொண்ட இந்த புத்தகத்தை 100 ரூபாய் விலைக்கு விற்க விரும்புகிறேன்.

நண்பர்கள் ஒரு புத்தகத்திற்கு 100 ரூபாய்க்குமேல் விலை வழங்கினால், அந்த உயர்த்தொகை (ப்ரீமியம்) திரைப்பட இலக்கியச் சங்கமத்தின் வளர்ச்சிக்கு பயன்படும். அப்படி உதவுபவர்கள் அனைவரும் இந்த சங்கமத்தின் புரவலர்களாகவும் மதிக்கப்படுவார்கள்.

இப்புத்தகத்தை அச்சிடுவதற்காக (முன்பதிவாக) 1000 ரூபாய்க்குமேல் உதவிசெய்யும் புரவலர்களின் பெயர்கள் இந்த புத்தகத்தில் குறிப்பிடப்படும்.

நண்பர்கள் அனைவரும் இந்த முயற்சியை வெற்றிபெறச்செய்து உதவுங்கள், ஒத்துழைப்பு தாருங்கள்.

--- கமலபாலா பா.விஜயன்

புத்தகங்களுக்கான தொகையை நேரிலோ அல்லது ‘B.Vijayan, SB a/c no: 602852861, Indian Bank, Saligramam Branch, IFSC code IDIB000S082’ என்ற வங்கிகணக்கிலோ செலுத்தலாம்.

திரைத்துறையில் வெற்றிபெறுவது எப்படி: பாகம் 1

திரைத்துறையில் வெற்றிபெறுவது எப்படி: பாகம் 1

திரைப்படம்- தயாரிப்பாளர்களின் கலை

திரைத்துறையில் வெற்றிபெறுவது எப்படி என்பதற்கு மட்டுமல்ல, திரைத்துறையை வெற்றிபெறச்செய்வது எப்படி என்ற கேள்விக்கும் பதிலைத் தேடும் ஒரு முயற்சி...

இந்தியசினிமாக்களை மட்டுமே அடிப்படையாக தொகுத்த கட்டுரைகள்...

இந்திய சினிமாவை, முக்கியமாக தமிழ் சினிமாவை வளர்ச்சிப்பாதையில் அழைத்துச்செல்ல வழிகாட்டும் கருத்துக்கள்...

திரைப்படம் மற்றும் திரைத்துறைபற்றிய அடிப்படை விஷயங்களை அறிந்துகொள்ள உதவும் ஒரு அரிச்சுவடி...

திரைத்துறையில் வாய்ப்பைத்தேடி அலைந்துகொண்டிருக்கும் திறமைசாலிகளை சிந்திக்கவைத்து, அவர்களுக்கு வெற்றியின் பாதையை காண்பிக்கும் கைகாட்டி...

தயாரிப்பாளர்களைப்பற்றி மற்ற படைப்பாளிகளும் கலைஞர்களும் அறிந்திருக்க வேண்டிய, ஆனால் அறியமறந்த பல அடிப்படை விஷயங்களின் தொகுப்பு...

திரைப்படத்தை விரும்பும் அனைவரும் அறிந்திருக்கவேண்டிய, திரைத்துறையில் வெற்றிபெற விரும்பும் அனைவரும் தெரிந்திருக்கவேண்டிய கருத்துக்களின் முதல் தொகுப்பு...

தொடர்ந்து படிக்க:

திரைப்படம் தயாரிப்பளர்களின் கலை

திரைப்பட இலக்கியச் சங்கமம் 8-10-16, கோரிக்கை

நண்பர்களே,

வழக்கம்போலத்தான் இந்த முறையும் நிகழ்வை நடத்த திட்டமிட்டிருந்தேன். நண்பர்களை முகநூல் முலமாகவும் மற்ற விருந்தினர்களை தொலைபேசி மற்றும் வாட்ஸ்அப் மூலமாகவும் அழைக்கும் பணிகளும் நடந்துகொண்டிருக்கின்றன.

நமது நிகழ்வு நடக்கும் அதே நாள், அதே நேரம், வேறு ஒரு நிகழ்ச்சியில் இம்மாத நிகழ்விற்காக நாம் தேர்ந்தெடுத்த படங்களின் (குற்றமே தண்டனை, ஆண்டவன் கட்டளை) இயக்குநர் பங்குபெற உள்ளதாக இன்று முகநூலில் ஒரு அழைப்பிதழை பார்த்தேன்.

அதனால் ஒரு விஷயம் நன்றாக தெரிகிறது. கண்டிப்பாக நமது நிகழ்வில் அந்த இயக்குநர் பங்குபெற வாய்ப்பில்லை!

இதற்கு முன்பும் இதேபோல இருமுறை நேர்ந்திருக்கிறது. ‘விசாரணை மற்றும் கபாலி’ படங்களை நமது சங்கமத்தில் அலச தீர்மானித்தபோதும் அந்த இயக்குநர்கள் அதே நாளில் மற்றொரு நிகழ்வில் கலந்துகொள்வதை பார்த்திருக்கிறேன். இதில் என்ன விசேஷம் என்றால், அந்த மூன்று நிகழ்வுகளும் எனக்கு தெரிந்த நண்பர்கள் நடத்தும் நிகழ்வுகள்தான்!

கடந்த இரண்டு முறையும் நடந்தது போலவே இன்றும் இதை நினைத்து வருத்தப்பட்டேன். பிறகு யோசித்தேன். ‘இதையே நமது சங்கமத்தின் அடுத்தகட்ட வளர்ச்சிக்காக பயன்படுத்தினால் என்ன’ என்று தோன்றியது.

படைப்பாளிகளுடன் (குறிப்பாக இயக்குநர்களுடன்) கலந்துரையாடுவது ஒரு ரகம். அது இப்படி பல நிகழ்வுகளில் நடந்துகொண்டுதான் இருக்கின்றன. படைப்புகளைப்பற்றி ரசிகர்களும் விமர்சகர்களும் கலந்துரையாடுவது இரண்டாவது ரகம். நாம் இரண்டாவது ரகத்தை பின்பற்றலாம்.

இயக்குநர்கள் நமது நிகழ்விற்கு வராததை நமக்கு சாதகமாக்க முடிவு செய்துள்ளேன். இயக்குநர் இல்லை என்பதால் இந்த படங்களைப்பற்றி நாம் அனைவரும் மனம் விட்டு விமர்சிக்கலாம். பாராட்டலாம். கருத்துக்களை பரிமாறலாம்.

இதனால் அனைவருக்கும் (அளவாக) பேச வாய்ப்பு தரலாம்!

படங்களைப்பற்றி அனைத்து விஷயங்களையும் (கவுரமாக) பேச வாய்ப்பு தரலாம்.

இதை நாம் கடந்த சில சங்கமங்களில் அனுபவித்து ரசித்திருக்கிறோம்.

இந்த முறை தொடர்ந்து இந்த நிகழ்விற்கு வரும் அனைவருக்கும் பயனுள்ளதாக இருக்கும் என்று நம்புகிறேன்.

(உங்கள் கருத்துக்கள் வரவேற்கப்படுகின்றன.)

அதற்காக நண்பர்கள் அனைவரும் தேர்ந்தெடுத்த படங்களை பார்த்துவிட்டு வரவேண்டும்! ‘திருட்டு விசிடி’யிலாவது பார்த்துவிட்டு வாருங்கள். இதுவே என் கோரிக்கை.

மற்றபடி இந்த நிகழ்வை படமாக்கினால் (வீடியோ) அனைவருக்கும் பயனுள்ளதாக இருக்கும் என்று பல நண்பர்கள் குறிப்பிடுகின்றனர். நிகழ்விற்கு வரும் நண்பர்களில் யாராவது இதற்கு உதவிசெய்தால் நன்றாக இருக்கும்.

வீடியோவை இணையத்தில் பதிவேற்றும் போது படமெடுத்தவர் பெயரை குறிப்பிட்டே ஏற்றுகிறேன்.

நண்பர்களே பரிசீலியுங்கள்! இது இன்னொரு கோரிக்கை.

மற்றபடி தயாரிப்பாளர்கள் பற்றிய கலந்துரையாடலும், புத்தகம் பற்றிய அறிமுகமும் திட்டமிட்டபடியே நடக்கும்.

நிகழ்வில் சந்திப்போம்.